Pas humbjes në “Wembley” me Anglinë, nesër Shqipëria do të luajë në “Arenën Kombëtare”, ndaj Andorrës. Deri tani mësohet se janë shitur 15 mijë bileta.
Ndërkohë, FSHF ka vendosur që përveç shitjes së zakonshme të biletave në sistemin online, tifozët të kenë mundësi të blejnë biletat edhe pranë pikës fizike që gjendet pranë stadiumit kombëtar.
“Federata e Futbollit njofton të gjithë futbolldashësit dhe tifozët e Kombëtares se nga sot kanë mundësi që të blejnë biletat fizike për ndeshjen e 24 marsit, Shqipëri-Andorra.
Departamenti i Komunikimit bën me dije se të gjithë të interesuarit mund të blejnë bileta fizike tashmë pranë pikës së shitjes që ndodhet pranë hyrjes tribunës kryesore të stadiumit “Arena Kombëtare”.
Njëkohësisht, biletat për këtë ndeshje do të vazhdojnë të shiten edhe online në linkun që mund ta gjeni në faqen zyrtare Fshf.org”, thuhet në njoftimin për shtyp të FSHF-së.
