Zonat malore të juglindjes së vendit janë zgjuar këtë mëngjes nën reshje dëbore, duke sjellë një panoramë tipike dimërore në disa prej destinacioneve më të frekuentuara turistike.
Reshjet kanë qenë më të dendura në fshatrat turistikë të Dardhës dhe Voskopojës, ku trashësia e dëborës në Dardhë ka arritur deri në 10 cm. Ndërkohë, në aksin rrugor Shtyllë–Qafë Mashkullore, në disa segmente, shtresa e dëborës varion nga 15 deri në 20 cm.
Dëborë është regjistruar gjatë orëve të fundit edhe në fshatrat e Devollit të Sipërm, si dhe në zona të tjera malore të qarkut të Korçës.
Deri më tani nuk raportohen probleme në qarkullimin e automjeteve. Megjithatë, autoritetet u bëjnë apel drejtuesve të mjeteve që planifikojnë të udhëtojnë drejt këtyre zonave gjatë fundjavës, të jenë të pajisur me goma dimërore dhe të tregojnë kujdes të shtuar në rrugë.
