Emrat e mëdhenj kanë nisur të lënë gjurmë në Kupën e Botës 2026. Vinicius, Mbappé, Haaland dhe Messi kanë qenë vendimtarë për kombëtaret e tyre, duke treguar se në skenën më të madhe presioni nuk i tremb.
Vinicius ishte ndër të parët që dha sinjalin e tij, duke shënuar golin e barazimit për Brazilin ndaj Marokut. Në një ndeshje ku skuadra e Carlo Ancelottit nuk bindi, ylli brazilian mori përsipër sulmin dhe shmangu humbjen e “Seleçaos”.
Më pas erdhi radha e Mbappés, i cili udhëhoqi Francën ndaj Senegalit. Sulmuesi i Real Madrid shënoi dy gola dhe tregoi një lidhje shumë të mirë me Olise, një tjetër lojtar që la gjurmë në debutimin e francezëve.
Edhe Erling Haaland nuk zhgënjeu. Në debutimin e tij në Kupën e Botës, sulmuesi i Manchester City gjeti menjëherë rrugën e rrjetës dhe u kthye në makth për mbrojtjen e Irakut.
Ndërkohë, Messi vazhdoi të shkruajë historinë në Botërorin e tij të gjashtë. Argjentina rrotullohet ende rreth tij dhe kapiteni tregoi edhe një herë se, pavarësisht moshës, mbetet vendimtar në momentet e mëdha.
I vetmi nga emrat më të pritur që nuk arriti të linte gjurmë ishte Lamine Yamal, në një Spanjë pa shumë shkëlqim dhe me pak minuta për talentin e Barcelonës.
Tashmë vëmendja kalon te dy emra të tjerë të mëdhenj që ende nuk kanë debutuar: Jude Bellingham me Anglinë dhe Cristiano Ronaldo me Portugalinë. Sidomos për Ronaldon, Botërori i gjashtë pritet të jetë një tjetër mundësi për të ndjekur gjurmët e Messit.
Yjet e mëdhenj po përgjigjen në fushë dhe Botërori sapo ka nisur.
