Sektori i televizionit në Shqipëri po përjeton vështirësi të theksuara ekonomike për shkak të zhvillimeve teknologjike dhe ndryshimeve në sjelljen e audiencës, veçanërisht të të rinjve që po orientohen drejt rrjeteve sociale dhe platformave digjitale.
Kjo ka sjellë një zhvendosje të buxheteve të reklamave nga televizionet drejt influencuesve dhe marketingut online.
Në vitin 2024, qarkullimi i 10 televizioneve që raportuan të dhëna ishte 6.6 miliardë lekë, duke shënuar një rënie prej 0.35%, ndërkohë që 5 prej tyre patën tkurrje të të ardhurave. Tatimet ndërkohë kanë nisur hetime lidhur me personazhet e rrjeteve sociale për të ardhura të padeklaruara nga platformat sociale, ku dyshohet për rreth 33 milionë euro.
Vetëm “Tv Klan” dhe “Top Channel” rezultojnë me fitime, ndërsa pjesa tjetër e tregut operon me humbje. Klan mbetet lider, megjithëse me rënie të lehtë të të ardhurave dhe fitimeve, ndërsa Top Channel i ka rritur të ardhurat, falë suksesit të programeve si “Big Brother”. Vizion Plus ka shënuar rritjen më të lartë, por me fitime minimale. Ndërkohë, televizione të tjera si ABC News, News24 dhe Euronews kanë shënuar rënie të forta të të ardhurave dhe humbje të mëdha.
Mungesa e hyrjes së kompanive të reja të mëdha në treg dhe orientimi i reklamuesve drejt digjitalit po e bëjnë këtë sektor gjithnjë e më pak fitimprurës.
