Një ngjarje e pazakontë ndodhi në orët e para të mëngjesit të së martës, më 18 qershor, në Romë, kur një 80-vjeçar tentoi të zbresë me makinën e tij, një Mercedes A-Class, shkallët e famshme të Scalinata di Trinità dei Monti, që lidhin Sheshin Spanjoll me kishën Trinità dei Monti.
Sipas Policisë së Romës, automjeti arriti të zbresë disa shkallë përpara se të ndalej. Fatmirësisht, nuk pati të lënduar. Shoferi, sipas autoriteteve, nuk kishte konsumuar alkool, por ndodhej në gjendje konfuzioni, sipas raportimit të gazetës Il Corriere della Sera.
Në një foto të publikuar nga policia, i moshuari shfaqet i qetë duke biseduar me një efektiv policie pranë makinës, i veshur me kostum.
Zjarrfikësit ndërhynë për të hequr makinën me vinç, ndërsa një video e realizuar nga një punonjës hoteli tregoi momentin kur automjeti zbriste ngadalë shkallët. Ai fillimisht mendoi se bëhej fjalë për xhirime filmi, derisa kuptoi se nuk kishte asnjë ekip produksioni aty.
Shkallët e Sheshit Spanjoll janë një nga monumentet më të njohura në Romë dhe dëmtimi i monumenteve historike në Itali dënohet me burgim deri në një vit dhe gjobë mbi 2.000 euro.
Ky nuk është incidenti i parë i këtij lloji. Në vitin 2022, disa turistë amerikanë shkaktuan dëm prej 25.000 eurosh duke hedhur një trotinet elektrik nëpër shkallë, ndërsa një tjetër person zbriti aksidentalisht me një Maserati, pas një kthese të gabuar.
Edhe pse kësaj radhe nuk pati pasoja të rënda, rasti vë në dukje edhe një herë se monumentet historike nuk janë të mbrojtura nga pakujdesia njerëzore.
