Një zjarr i fuqishëm përfshiu terminalin e mallrave të Aeroportit Ndërkombëtar Hazrat Shahjalal në kryeqytetin e Bangladeshit, Dhaka. Zjarri, që shpërtheu në orët e para të mëngjesit, u vu nën kontroll pas plot 7 orësh përpjekjesh intensive nga shërbimet e emergjencës.
Në operacionin për shuarjen e flakëve u angazhuan gjithsej 37 ekipe zjarrfikësish. Për të garantuar sigurinë, autoritetet vendosën pezullimin e përkohshëm të të gjitha fluturimeve, ndërsa avionët u zhvendosën nga hangarët në zona më të sigurta të aeroportit.
Për shkak të incidentit, shumë fluturime u shtynë ose u ridrejtuan në aeroporte të tjera, duke shkaktuar vonesa dhe shqetësime për udhëtarët.
Aktualisht, autoritetet janë duke hetuar shkakun e zjarrit, ndërsa po vlerësohet edhe dëmi i shkaktuar.
