Një 24-vjeçar ka humbur jetën pas një aksidenti të rëndë në det, në zonën mes Rrjollit dhe Ranës së Hedhun, në Shëngjin.
Fillimisht, u raportua se i riu humbi jetën pas përplasjes mes dy skafeve në det.
Megjithatë, sipas njoftimit zyrtar të Policisë, i riu, Klaus Gjergji, ndodhej në bord të një gomoneje së bashku me dy persona të tjerë, kur dyshohet se aksidentalisht ka rënë nga mjeti lundrues.
Gjatë rënies në det, 24-vjeçari është dëmtuar rëndë nga helika e motorit të gomones.
Pas marrjes së njoftimit, shërbimet e Policisë Kufitare dhe të Njësisë Policore Detare kanë shkuar menjëherë në vendngjarje dhe kanë bërë të mundur nxjerrjen e të riut.
I riu është transportuar fillimisht nga shërbimet e Policisë Kufitare dhe më pas me autoambulancë drejt spitalit, por, pavarësisht ndërhyrjes mjekësore, nuk ka mundur t’u mbijetojë plagëve të marra.
Ndërkohë, grupi hetimor po vijon veprimet për të sqaruar plotësisht rrethanat e aksidentit dhe dinamikën e ngjarjes.
