Edhe pse korriku sapo ka hyrë, Europa ka përjetuar tashmë dy valë të forta të të nxehtit, të cilat kanë thyer rekorde dhe konsiderohen si një tregues i qartë i klimës së re që po krijohet nga ndryshimet klimatike.
Pas temperaturave të larta të muajit maj, qershori solli vapë edhe më ekstreme, duke thyer rekorde në shumë vende europiane. Sipas Organizatës Botërore te Meteorologjise, kjo ishte një ngjarje e jashtëzakonshme, ndërsa një tjetër valë të nxehti pritet të godasë kontinentin.
Vala e qershorit ishte veçanërisht e rëndë për shkak të kombinimit të temperaturave shumë të larta dhe lagështisë së madhe, e cila e bën më të vështirë ftohjen e trupit përmes djersitjes. Temperaturat mbetën të larta edhe gjatë natës, duke mos e lejuar organizmin që të pushojë. Në Cardiff u regjistrua nata më e ngrohtë e qershorit në historinë e Mbretërisë së Bashkuar, ndërsa shumica e Anglisë dhe Uellsit përjetuan të paktën një “natë tropikale”, kur temperaturat nuk zbresin nën 20 grdë Celsius, fenomen ky që dikur ishte shumë i rrallë në Britani. Shkencëtarët theksojnë se netët tropikale dhe valët ekstreme të të nxehtit do të bëhen gjithnjë e më të shpeshta, pasi temperaturat globale vazhdojnë të rriten.
Sipas ekspertëve të Met Office, ndryshimet klimatike të shkaktuara nga aktiviteti njerëzor i kanë bërë këto ngjarje më të mundshme dhe më intensive. I njëjti sistem atmosferik që coi vapën ekstreme në Mbretërinë e Bashkuar preku edhe pjesën më të madhe të Europës. Gjermania e cilësoi këtë valë si “një valë të nxehti që do të hyjë në histori”, ndërsa Franca e përshkroi si “historike” dhe “jashtëzakonshme”. Më shumë se 12 vende në Europën Perëndimore, Qendrore dhe Lindore thyen rekordet e temperaturave të qershorit, në disa raste me diferenca prej 2-3°C krahasuar me rekordet e mëparshme.
Disa vende regjistruan temperatura mbi 40°C, duke vendosur rekorde të reja për çdo periudhë të vitit, edhe pse qershori zakonisht është më i freskët se korriku. Sipas metereologeve, edhe pse këto temperatura janë të pazakonta krahasuar me të dhënat historike, ato nuk janë më të papritura në kushtet e ngrohjes globale. Rritja e temperaturave globale gjatë shekullit të fundit lidhet kryesisht me emetimet e gazeve serrë nga aktiviteti njerëzor.
Europa po ngrohet më shpejt se shumë rajone të tjera të botës, gjë që e bën kontinentin gjithnjë e më të ekspozuar ndaj valëve të shpeshta dhe intensive të të nxehtit ekstrem.
