Ndërhyrja emergjente e realizuar në vitin 2024 në Urën e Zogut mbi lumin Mat nuk e ka shpëtuar monumentin e kulturës. Struktura dhe këmba e urës në pjesën veriore kanë shfaqur sërish probleme, duke rrezikuar shembjen e plotë të saj. Aktivistët e shoqërisë civile në Kurbin, të cilët e kanë ndjekur në vazhdimësi këtë çështje, u bëjnë thirrje institucioneve përgjegjëse që të ndërhyjnë sërish për shpëtimin e këtij monumenti me vlera të jashtëzakonshme historike.
“Ne i bëjmë thirrje qeverisë shqiptare, Ministrisë së Turizmit dhe Kulturës që të marrë masa për ta rindërtuar këtë urë ashtu siç ishte sepse trashëgimia jonë kulturore është shumë e rëndësishme”, thotë aktivisti Elton Laska.
Aktivistët kërkojnë rivlerësim të gjendjes së urës dhe transparencë për paratë e shpenzuara gjatë ndërhyrjes emergjente të vitit 2024.
“Aktivistët kërkojnë publikisht transparencë të plotë mbi fondet publike të investuara nga inspektimi, zbatimi, mbikëqyrja dhe çdo ndryshim kontraktor që është lidhur me këtë projekt, informim periodik dhe publik me rezultatet e monitorimit që komuniteti të njihet me gjendjen reale të monumentit dhe çdo zhvillim në sigurinë e saj, vlerësim të vazhdueshëm teknik dhe profesional për të garantuar që çdo nevojë për ndërhyrje shtesë të identifikohet në kohë”, thotë aktivistja Elsa Sula.
Investimi i realizuar nga qeveria me vlerë 46 milionë lekë të reja, 2 vite më parë, konsistoi në përforcimin e njërës prej këmbëve të urës, e cila u fundos në lumë me rreth 2.5 metra, por kjo ndërhyrje nuk i ka dhënë zgjidhje problematikës.
Ura e Zogut, ndërtuar në vitin 1927, është një nga monumentet më të rëndësishme të infrastrukturës historike shqiptare. Por në vitet e fundit, për shkak të vërshimeve të ujit dhe shfrytëzimit pa kriter të lumit Mat për inerte, ura ka pësuar dëmtime të shumta, duke vënë në rrezik ekzistencën e saj.
