Sot, nga ora 09:00 deri në 11:00, zhvillohen homazhet në nder të gjyqtarit Astrit Kalaja, i cili humbi jetën tragjikisht brenda sallës së gjyqit, pas një atentati me armë zjarri nga Elvis Shkambi. Në ceremoninë mortore pritet të marrin pjesë figura shtetërore, kolegë, miq dhe familjarë.
Ngjarja ndodhi gjatë një seance gjyqësore për një çështje pronësie, ku palë në proces ishin edhe Ragip dhe Ervis Kurtaj, të cilët mbetën të plagosur nga të shtënat, por jashtë rrezikut për jetën. Elvis Shkambi, autori i krimit, është nipi i Gjon Shkambit, një prej palëve në gjyq.
Sipas hetimeve paraprake, Shkambi hyri në Gjykatën e Apelit të armatosur, ndonëse pajisja e sigurisë sinjalizoi praninë e një objekti metalik. Pavarësisht alarmit, punonjësi i sigurisë Banush Koxhaj nuk kreu kontroll fizik, duke lejuar kalimin e autorit pa asnjë verifikim.
Autorët qëndruan për rreth dy orë në ambientet e pritjes, përpara se të hynin në sallën nr. 3 ku po zhvillohej seanca. Në orën 15:35, menjëherë pas shpalljes së vendimit, Shkambi nxori armën dhe qëlloi disa herë drejt gjyqtarit Kalaja, i cili ndërroi jetë gjatë transportit drejt spitalit.
Pas ngjarjes, autori u dorëzua pa rezistencë, duke i dhënë armën një punonjësi gjyqësor dhe më pas u arrestua nga policia në oborrin e gjykatës. Ai ka deklaruar se krimi ishte një reagim i menjëhershëm pas vendimit të gjyqtarit, të cilin e kishte kuptuar se ishte në favor të palës tjetër.
Hetimet po vazhdojnë për të zbardhur rolin e xhaxhait të autorit, Gjon Shkambi, i cili dyshohet se ka pasur dijeni për planin dhe nuk bëri asnjë përpjekje për të parandaluar ngjarjen. Ndërkohë, punonjësi i sigurisë Banush Koxhaj po hetohet për shpërdorim detyre.
