Princesha Amalia e Holandës, 21 vjeç, pësoi një aksident këtë të martë pasi ra nga kali dhe theu dorën.
Sipas një njoftimi zyrtar nga pallati mbretëror, trashëgimtarja e fronit u transportua menjëherë në spital, ku iu nënshtrua një ndërhyrjeje kirurgjikale.
Amalia, vajza e madhe e mbretit Willem-Alexander, është e pasionuar pas kalërimit që në fëmijëri dhe ka praktikuar rregullisht këtë sport ndër vite.
Princesha kishte qëndruar për më shumë se një vit në Spanjë gjatë vitit 2023, pasi ishte detyruar të largohej nga vendi për arsye sigurie.
Emri i saj ishte përmendur në komunikime mes grupeve kriminale, duke ngritur dyshime për një plan rrëmbimi të mundshëm. Edhe pse kërcënimi nuk është eliminuar plotësisht, Amalia është rikthyer në Holandë vitin e kaluar.
Në vitin 2022, kur nisi studimet në Universitetin e Amsterdamit, pati shumë diskutime mbi dëshirën e saj për të jetuar në një konvikt studentor. Megjithatë, për arsye sigurie, ajo u detyrua të kthehej në pallatin mbretëror në Hagë, i cili ruhet me masa të larta sigurie.
