Një ngjarje e rëndë ka ndodhur në fshatin Palasë të Maliqit, ku është gjetur i pajetë 45-vjeçari Eduard Çarçani. Sipas burimeve nga vendngjarja, trupi i tij u gjet i varur në kangjellat e murit rrethues të një banese.
Një banor i zonës tha se Çarçani kishte jetuar për shumë vite në Itali me familjen e tij, ndërsa së fundmi ishte kthyer në Shqipëri. “Ai kishte vite që jetonte jashtë, por shtëpia këtu ishte e pa banueshme,” – tregoi banori, duke shtuar se viktima kishte pasur probleme me alkoolin.
Dyshohet se ngjarja ka ndodhur aksidentalisht, në momentin kur Çarçani ka tentuar të hyjë në një banesë që nuk ishte e tij. Gjatë përpjekjes për të kaluar murin, bluza e tij është ngecur në kangjella, duke i shkaktuar mbytje fatale.
Sipas informacioneve paraprake, 45-vjeçari mund të ketë qenë në gjendje të dehur në momentin e ngjarjes. Policia po heton për të zbardhur plotësisht rrethanat, ndërsa ka marrë dëshmi nga banorët e zonës dhe ka sekuestruar provat nga vendi i ngjarjes.
Kjo ngjarje ka tronditur komunitetin lokal, duke rikthyer vëmendjen te pasojat e rënda që mund të sjellë abuzimi me alkoolin dhe problemet sociale që shpesh mbeten të pashqyrtuara në kohë.
