Rikthimi i moderatorit Jimmy Kimmel në ekranin e ABC ka shkaktuar një valë kritikash, mes tyre edhe një reagim të ashpër nga ish-presidenti amerikan, Donald Trump, i cili akuzon si prezantuesin, ashtu edhe rrjetin televiziv për “anshmëri politike” dhe për “kontribut të paligjshëm” ndaj fushatës së demokratëve.
Përpara transmetimit të parë pas rikthimit, Trump reagoi në platformën e tij Truth Social, duke thënë se “nuk mund ta besojë” që ABC i riktheu emisionin Kimmel-it, dhe sugjeroi se rrjeti mund të përballet me pasoja ligjore.
“Pse do të donin të kthenin dikë që po dështon, që nuk është aspak qesharak dhe që rrezikon rrjetin duke transmetuar 99% mbështetje për plehrat e demokratëve?”, shkruajti Trump.
Ai e akuzoi ABC-në si “një tjetër degë të Komitetit Kombëtar Demokrat” (DNC) dhe shtoi:
“Sipas dijenisë time, kjo përbën një kontribut të madh dhe të paligjshëm në një fushatë zgjedhore. Do ta hetojmë ABC-në për këtë. Herën e fundit që i ndoqa ligjërisht, mora 16 milionë dollarë. Kjo çështje duket edhe më fitimprurëse. Një grup i vërtetë humbësish! Le të kalbet Jimmy Kimmel me shifrat e tij të ulëta të audiencës.”
Kimmel i prekur pas pezullimit: “Nuk ishte qëllimi im të ofendoja”
Kimmel u rikthye në transmetim të martën, duke mbrojtur satirën politike dhe duke kundërshtuar “presionin” që, sipas tij, po ushtron administrata e Trump ndaj mediave.
Gjashtë ditë më parë, ai u pezullua nga ABC (nën pronësinë e Disney) pas komenteve të tij për vrasjen e aktivistit konservator Charlie Kirk. Në një monolog drejtpërdrejt, Kimmel kishte komentuar që mbështetësit e Trump po përpiqeshin të “përfitonin politikisht” nga ngjarja tragjike.
“Nuk ishte kurrë qëllimi im të flisja lehtë për vrasjen e një të riu. Nuk ka asgjë qesharake aty”, tha ai para publikut, i emocionuar.
“Nuk doja të akuzoja ndonjë grup specifik. E kundërta ishte qëllimi im”, shtoi Kimmel.
ABC e kishte pezulluar përkohësisht emisionin më 17 shtator, vetëm dy ditë pas komenteve të tij për rastin Kirk. Me rikthimin në ekran, duket se debati për kufirin mes satirës, politikës dhe etikës mediatike sapo ka nisur.
