Presidenti i SHBA-së, Donald Trump, ka mbrojtur vendimin e tij për të sulmuar Iranin, duke deklaruar se ndërhyrja amerikane ka penguar Teheranin të pajiset me armë bërthamore.
Në një intervistë me komentatorin Wayne Allyn Root, Trump tha se nëse nuk do të kishte ndërmarrë veprimet ushtarake, Irani do të kishte aktualisht armë bërthamore.
“Nëse nuk do të bëja atë që bëra, ata do të kishin tani armë bërthamore dhe ju do t’i quanit ‘zotëri’. Do t’i quanit ‘zotëri’”, tha Trump.
Presidenti amerikan foli edhe për gjendjen ekonomike të Iranit, duke pretenduar se vendi po përballet me një krizë të thellë. Trump tha se SHBA-ja ka tre strategji të mundshme ndaj Teheranit, vazhdimin e presionit aktual, intensifikimin e goditjeve ose mposhtjen e Iranit përmes presionit ekonomik.
“Kanë inflacion 300%. Monedha e tyre nuk ka pothuajse asnjë vlerë. Nuk paguajnë ushtarët e tyre. Ushtarët po largohen”, deklaroi ai.
Sipas Trump, ekonomia iraniane është në kaos dhe Teherani nuk është në gjendje të marrë hua.
“Ne kontrollojmë paratë e tyre, ato që kishin, të cilat janë shumë. Dhe ne kemi kontroll absolut mbi to. Unë jam bankieri i tyre”, tha presidenti amerikan.
