Presidenti amerikan, Donald Trump mbajti fjalimin më të gjatë në historinë e SHBA-ve, teksa foli për rreth 1 orë e 48 minuta në Kongresin Amerikan.
“Vendi ynë është rikthyer.” Këto ishin fjalët e para të Donald Trump për Gjendjen e Kombit, shkruan Corriere della Sera.
“Vendi ynë është rikthyer, më i madh, më i fortë dhe më i pasur se kurrë. Ne nuk do të kthehemi prapa; kjo është epoka e artë e Amerikës”, shtoi Trump, duke theksuar se Amerika nuk ka qenë kurrë kaq e respektuar.
Trump shtrëngoi duart me të katër anëtarët e Gjykatës Supreme që morën pjesë në fjalimin e tij në Kongres, pavarësisht kritikave të ashpra që ai u bëri ditë më parë pas vendimit kundër tarifave doganore.
Trump u shfaq për t’i përshëndetur të katërt, Kryetarin e Gjykatës Supreme, John Roberts dhe gjyqtarët, Elena Kagan, Brett Kavanaugh dhe Amy Coney Barrett, duke shkëmbyer disa fjalë ndërsa ecte drejt foltores.
“Gjykata Supreme ka nxjerrë një vendim të pafat”, tha Trump.
“Lajmi i mirë është se pothuajse çdo vend dhe çdo biznes dëshiron ta mbajë marrëveshjen, duke e ditur se fuqia ligjore që unë kam mund ta bëjë marrëveshjen shumë më keq për ta. Ne vazhdojmë të ecim përpara në rrugën e duhur: pavarësisht këtij vendimi zhgënjyes, këto tarifa që ruajnë paqen do të mbeten në fuqi. Ato janë testuar prej kohësh; nuk do të jetë e nevojshme asnjë veprim i Kongresit. Tarifat do të heqin një barrë të madhe financiare nga njerëzit që dua”, theksoi ai.
Ndër të tjera, Trump tha se Irani ka raketa që mund të godasin Europën dhe paralajmëroi se së shpejti mund të arrijë SHBA-në.
Sipas tij, Irani është mbështetës i terrorizmit dhe pretendoi se regjimi ka vrarë 32 mijë protestues.
Lidhur me luftën mes Rusisë dhe Ukrainës, shefi i Shtëpisë së Bardhë deklaroi se po vriten 25 mijë ushtarë çdo muaj dhe shtoi se po punohet që këtij konflikti t’i jepet fund.
Trump përmendi edhe Venezuelën, ku nënvizoi se SHBA tashmë ka marrë 80 milionë fuçi naftë nga vendi amerikano-latin.
