Pasi u betua si President i 47-të i SHBA-së, Donald Trump e filloi fjalimin e tij duke iu drejtuar ish-presidentëve dhe personave të tjerë të pranishëm në ceremoni, duke përfshirë ish-zëvendëspresidenten Kamala Harris dhe ish-presidentin Joe Biden.
“Epoka e artë e Amerikës fillon pikërisht tani,” tha ai.
“Nga kjo ditë e tutje vendi ynë do të lulëzojë dhe do të respektohet.”
“Unë thjesht do të vendos Amerikën në vend të parë.”
“Sovraniteti ynë do të rifitohet, siguria jonë do të rikthehet, peshorja e drejtësisë do të ribalancohet,” thotë ai.
“Prioriteti ynë kryesor do të jetë krijimi i një kombi krenar, të begatë dhe të lirë,” thotë Trump.
Trump theksoi se po rikthehet në presidencë “i sigurt dhe optimist” dhe se është “fillimi i një epoke të re emocionuese të suksesit kombëtar”.
Trump në fjalimin e tij të parë gjithashtu sulmoi administratën Biden dhe mënyrën se si e trajtoi krizën e emigrantëve.
Ai thotë se sfidat e vendit do të “asgjësohen”, duke shtuar se SHBA po përballet me krizën e “besimit ndaj një institucioni radikal dhe të korruptuar”.
Administrata e mëparshme, thotë ai, ka siguruar strehë dhe mbrojtje për “kriminelët e rrezikshëm” që kanë hyrë ilegalisht në vendin tonë.
