Donald Trump deklaroi të enjten se nuk ka nevojë për miratimin e Kongresit për të urdhëruar sulme tokësore ndaj Venezuelës, duke shprehur njëkohësisht shqetësim për rrjedhjen e informacionit të ndjeshëm.
I pyetur nga një gazetar nëse do të kërkonte miratimin e Kongresit për një veprim të tillë, Trump u shpreh: “Nuk do të më vinte keq t’u thoja atyre. Nuk kam nevojë”. Ai akuzoi disa politikanë se nxjerrin informacione konfidenciale, duke lënë të kuptohet se kjo është arsyeja e hezitimit të tij.
Prej disa muajsh, presidenti amerikan ka kërcënuar me sulme ndaj Venezuelës, kryesisht në kuadër të luftës kundër karteleve të drogës. Që nga shtatori, ushtria amerikane ka bombarduar anije të dyshuara për trafik droge, operacione që kanë shkaktuar vdekjen e të paktën 99 personave.
Megjithatë, ligjshmëria e këtyre veprimeve është vënë në pikëpyetje nga ekspertë dhe politikanë të të dyja partive. Demokratë dhe disa republikanë argumentojnë se Trump nuk ka autoritet ligjor për të urdhëruar sulme tokësore pa miratimin e Kongresit.
Në këtë kontekst, Dhoma e Përfaqësuesve hodhi poshtë të mërkurën dy projektligje që synonin të vendosnin një kornizë ligjore për këto sulme, ndërsa nisma të ngjashme në Senat nuk patën sukses.
Përfaqësuesi demokrat Gregory Meeks deklaroi se presidenti nuk ka provuar se ka autoritet sipas ligjit amerikan apo ndërkombëtar, duke shtuar se asnjë nga anijet e goditura nuk përbënte kërcënim të menjëhershëm për Shtetet e Bashkuara.
Nga ana tjetër, administrata Trump argumenton se veprimet e presidentit janë brenda kompetencave të tij, pasi bombardimet konsiderohen pjesë e një “konflikti të armatosur” me kartelet e drogës, të cilat janë shpallur “organizata të huaja terroriste”.
Sipas Kushtetutës së SHBA-së, vetëm Kongresi ka të drejtën të shpallë luftë, edhe pse presidentë të mëparshëm kanë kryer operacione ushtarake jashtë vendit duke u mbështetur në autorizime të veçanta, si “Autorizimi për Përdorimin e Forcës Ushtarake” (AUMF) pas sulmeve të 11 shtatorit.
