Presidenti amerikan kërkon heqjen e menjëhershme të çdo mine të mundshme në ngushticën strategjike të naftës
Presidenti i Shteteve të Bashkuara, Donald Trump, paralajmëroi Iranin për pasoja të rënda ushtarake nëse rezulton se ka vendosur mina në Ngushticën e Hormuzit, një nga rrugët më të rëndësishme të transportit të naftës në botë.
Në një postim në rrjetet sociale, Trump deklaroi se Uashingtoni kërkon që çdo minë e mundshme në këtë korridor detar strategjik të hiqet menjëherë.
“Nëse Irani ka vendosur mina në Ngushticën e Hormuzit, dhe ne nuk kemi raportime që e ka bërë këtë, duam që ato të hiqen menjëherë,” shkroi ai.
Presidenti amerikan paralajmëroi se nëse minat janë vendosur dhe nuk hiqen menjëherë, pasojat për Teheranin do të jenë të paprecedenta.
“Nëse për çfarëdo arsye minat janë vendosur dhe nuk hiqen menjëherë, pasojat ushtarake për Iranin do të jenë në një nivel që nuk është parë kurrë më parë,” theksoi Trump.
Megjithatë, ai shtoi se nëse minat eventuale hiqen, kjo do të konsiderohej një hap pozitiv drejt uljes së tensioneve.
“Nëse ato që mund të jenë vendosur hiqen, kjo do të ishte një hap i madh në drejtimin e duhur,” shtoi presidenti amerikan.
Deklarata e Trump vjen në një moment kur tensionet në Gjirin Persik janë rritur ndjeshëm. Raportime të inteligjencës amerikane kanë ngritur shqetësime se Irani mund të ketë nisur vendosjen e minave detare në Ngushticën e Hormuzit, një korridor përmes të cilit kalon rreth një e pesta e furnizimit global me naftë.
Një bllokim i mundshëm i kësaj rruge strategjike mund të shkaktojë një krizë të madhe në tregjet ndërkombëtare të energjisë dhe të rrisë më tej çmimet e naftës dhe karburanteve në mbarë botën.
