Presidenti amerikan Donald Trump tha të premten se do të takohet sërish me presidentin kinez Xi Jinping në nëntor, gjatë një vizite në Kinë, dhe më pas në dhjetor në samitin e G20 në Florida. Deklarata erdhi menjëherë pas vizitës shtetërore të Xi Jinping në Uashington.
Trump e cilësoi vizitën e Xi-t në SHBA si një sukses dhe tha se gjatë takimeve mes dy liderëve ishte arritur përparim në disa çështje. Samiti u zhvillua në një kohë kur marrëdhëniet SHBA-Kinë mbeten të fokusuara te tregtia, tarifat, inteligjenca artificiale dhe çështje të tjera strategjike.
Sipas Reuters, takimi i ardhshëm në nëntor pritet të zhvillohet në Kinë, ndërsa takimi i dhjetorit do të zhvillohet në kuadër të samitit të G20 në Florida. Të dyja palët kanë diskutuar gjithashtu zgjatjen e armëpushimit tregtar dhe mundësinë e bashkëpunimit në fushën e inteligjencës artificiale.
