Presidenti amerikan Donald Trump deklaroi se Shtetet e Bashkuara nuk do të lejojnë Iranin të zhvillojë armë bërthamore, ndërsa njoftoi nisjen e një bllokade detare ndaj porteve iraniane nga Marina amerikane.
Duke folur nga baza ushtarake Andrews në Maryland, Trump theksoi se “Irani nuk do të ketë armë bërthamore”, pavarësisht pretendimeve se Teherani vazhdon përpjekjet në këtë drejtim.
Ai shtoi se nuk është i interesuar për rifillimin e negociatave me Iranin, duke deklaruar: “Nëse nuk kthehen në tryezë, është në rregull për mua”.
Sipas autoriteteve amerikane, nga ora 17:00 (me kohën lokale) ka hyrë në fuqi bllokada ndaj anijeve të të gjitha shtetësive që hyjnë ose dalin nga portet iraniane, përfshirë ato në Gjirin Persik dhe Gjirin e Omanit.
Vendimi vjen pas dështimit të bisedimeve direkte mes SHBA-së dhe Iranit në Islamabad, ku të dyja palët fajësuan njëra-tjetrën për mungesën e marrëveshjes. Ndërkohë, Pakistani ka bërë thirrje për respektimin e armëpushimit dyjavor të arritur më herët, i cili teorikisht zgjat deri më 22 prill.
Sipas raportimeve, presidenti Trump po shqyrton edhe mundësinë e sulmeve të reja ushtarake ndaj Iranit, megjithëse një fushatë e gjerë konsiderohet më pak e mundshme për shkak të rrezikut të përshkallëzimit të konfliktit.
Situata ka ndikuar menjëherë në tregjet globale, me çmimin e naftës që u rrit mbi 100 dollarë për fuçi pas njoftimit të bllokadës.
Nga ana tjetër, Irani ka reaguar ashpër, duke deklaruar se nuk do të dorëzohet ndaj presioneve dhe duke paralajmëruar kontroll të plotë mbi lundrimin në ngushticën strategjike të Hormuzit.
Ndërkohë, tensionet vazhdojnë edhe në Liban, ku sulmet ajrore kanë shkaktuar viktima të tjera. Konflikti në rajon mbetet i paqëndrueshëm, duke rritur frikën për një përshkallëzim më të gjerë në Lindjen e Mesme.
