Bayern Munich ka siguruar me stil kualifikimin në gjysmëfinalet e Champions League, pasi eliminoi Real Madridin me rezultat të përgjithshëm 4-3, por drejtuesit e klubit bavarez nuk duan ta vendosin skuadrën e tyre në rolin e favoritit absolut.
Pas triumfit të madh në “Allianz Arena”, drejtori ekzekutiv i Bayern Munich, Jan-Christian Dreesen, foli me shumë kujdes për përballjen e ardhshme ndaj Paris Saint-Germain, duke theksuar se kampionët në fuqi mbeten skuadra për t’u mundur.
“Jo. Ne jemi një nga pretendentët. Por tani do të luajmë kundër Paris Saint-Germain. Ata kanë fituar bindshëm dy herë dhe janë kampionët në fuqi. Nëse ka një favorit, ai është Paris Saint-Germain”, deklaroi Dreesen.
Edhe presidenti Herbert Hainer foli me respekt të madh për kundërshtarin e ardhshëm, por njëkohësisht kujtoi se Bayern e ka mposhtur PSG-në më herët këtë sezon, në ndeshjen e ligës të zhvilluar në nëntor të vitit 2025.
“Nuk do të thosha se jemi favoritë, sepse Paris është një skuadër jashtëzakonisht e fortë. Ata e kanë mposhtur Liverpoolin dy herë. Por ne nuk kemi pse të kemi frikë nga askush. E treguam që vjeshtën e kaluar se mund t’i mundim edhe ata”, u shpreh Hainer.
Pavarësisht deklaratave modeste nga drejtuesit, Bayern ka arsye të forta për të besuar te vetja. Bavarezët po kalojnë një sezon të jashtëzakonshëm në aspektin ofensiv, me 157 gola të shënuar në 46 ndeshje, një mesatare prej 3.41 golash për takim.
Pas suksesit ndaj Real Madridit, Bayern është ngjitur gjithashtu në vendin e parë të renditjes pesëvjeçare të UEFA-s me 146,500 pikë, duke lënë pas vetë madrilenët.
Një nga armët më të forta të skuadrës së Vincent Kompany mbetet reparti ofensiv. Harry Kane, Luis Diaz dhe Michael Olise kanë formuar një treshe sulmuese fantastike, duke realizuar së bashku plot 92 gola gjatë këtij sezoni. Të tre gjetën rrugën e rrjetës edhe në ndeshjen e kthimit ndaj Real Madridit.
Për këtë arsye, Hainer nuk i kurseu elozhet për yjet e sulmit bavarez.
“Të tre së bashku, Diaz, Olise dhe Harry Kane, përbëjnë një repart ofensiv që çdo klub në botë do të dëshironte ta kishte”, tha ai.
Dreesen e mbështeti menjëherë këtë vlerësim, duke shtuar se Bayern ka një sulm fantastik, që do të jetë një provë e madhe edhe për PSG në gjysmëfinale.
