Një aksident i rëndë ka ndodhur mesditën e sotme, rreth orës 12:30, në rrugën nacionale Fier-Shegan-Kuçovë.
Sipas dëshmitarëve në zonë, një trajler me targa shqiptare, i cili po lëvizte në drejtim të Lushnjës, pasi vinte nga Berati ka përplasur fillimisht një automjet që ishte në lëvizje dhe më pas një tjetër automjet, i cili ishte i parkuar pranë një banese buzë rrugës.
Pas përplasjes, drejtuesi i trajlerit nuk ka ndaluar, por është larguar nga vendngjarja. Pas marrjes së njoftimit, shërbimet e policisë janë vënë në ndjekje të tij, por deri në këto momente nuk ka asnjë gjurmë nga shoferi.
Si pasojë e aksidentit, drejtuesja e njërit prej automjeteve ka mbetur e plagosur rëndë dhe është transportuar me urgjencë drejt Spitalit të Lushnjës për të marrë ndihmën mjekësore. Nga përplasja, automjeti i drejtuar prej saj ka përfunduar duke u përplasur me një shtyllë të tensionit, ndërsa automjeti tjetër, një “Audi”, ka pësuar dëme materiale.
Në vendngjarje ndodhen shërbimet e policisë dhe grupi hetimor, të cilët po punojnë për dokumentimin e plotë të rrethanave të aksidentit. Detaje të tjera priten në vijim nga Policia e Shtetit.
