Një ngjarje tronditëse ka dalë në dritë në New York, ku policia dyshon se një 64-vjeçare ka helmuar vajzën e saj 44-vjeçare dhe katër nipërit, përpara se t’i jepte fund jetës së saj. Sipas hetimeve paraprake, motivi lidhet me vendimin e gjykatës për t’i dhënë kujdestarinë e fëmijëve babait të tyre.
Autoritetet njoftuan se në banesë u gjet një letër e shkruar me dorë, e cila, sipas tyre, tregon se 64-vjeçarja ishte e përfshirë në vdekjen e vajzës dhe të katër fëmijëve të saj. Viktimat janë një vajzë 13-vjeçare, një djalë 11-vjeçar dhe binjakët 10-vjeçarë.
Hetimet zbuluan gjithashtu prova që tregojnë për helmim të qëllimshëm, përfshirë barna me recetë dhe pa recetë të gjetura në banesë. Njëri prej fëmijëve kishte edhe plagë të shkaktuara me thikë, ndërsa mediat amerikane raportojnë se në vendngjarje u gjetën edhe shiringa, me të cilat dyshohet se u janë injektuar substanca toksike fëmijëve.
Trupat u zbuluan në gjendje të avancuar dekompozimi, pasi një fqinj njoftoi policinë për mungesën e kontakteve me 64-vjeçaren prej disa ditësh. Sipas burimeve hetimore, ajo ishte e zemëruar nga vendimi që kujdestaria e fëmijëve t’i kalonte përkohësisht babait të tyre.
Babai i fëmijëve, i cili priste t’i takonte pas disa vitesh largimi, tha se kaloi brenda pak çastesh nga gëzimi i ribashkimit në dhimbjen e humbjes së tyre përgjithmonë. Hetimet për zbardhjen e plotë të kësaj tragjedie vijojnë.
