Pesë persona, shtetas italianë, kanë humbur jetën gjatë një zhytjeje në një shpellë nënujore në Maldive. Viktimat ndodheshin në një thellësi prej rreth 50 metrash, në një shpellë që shtrihet më shumë se 200 metra nën ujë.
Sipas mediave italiane, deri më tani është nxjerrë vetëm një trup, ndërsa katër të tjerët dyshohet se kanë mbetur të bllokuar në një pjesë tjetër të shpellës.
Operacioni i kërkim-shpëtimit po vështirësohet nga moti i keq në zonë.
Mes viktimave janë profesorja e Ekologjisë në Universitetin e Xhenovës, 51-vjeçarja Monika Montefalcone, vajza e saj 23-vjeçare Giorgia Somacal, dy studentët e saj Federico Gualtieri, 30 vjeç dhe Muriel Odenino, 31 vjeçe, si edhe instruktori i zhytjes Gianluca Benedetti.
Hetimet paraprake përqendrohen te disa pista, përfshirë probleme të mundshme me përzierjen e oksigjenit në bombolat e zhytjes, kushtet e pafavorshme atmosferike, rrymat e forta nënujore ose humbja e orientimit brenda shpellës. Mediat lokale raportojnë se në atë zonë zhytjet lejohen deri në thellësinë 30 metra.
Monika Montefalcone ishte një emër i njohur në fushën e ekologjisë detare dhe studimeve mbi ndikimin e ndryshimeve klimatike në ekosistemet ujore. Vajza e saj studionte inxhinieri biomjekësore, ndërsa dy studentët merrnin pjesë në një ekspeditë shkencore të nisur dy javë më parë në Maldive.
Instruktori i zhytjes, Gianluca Benedetti, kishte lënë karrierën në sektorin bankar për t’iu përkushtuar pasionit të tij për zhytjet, duke jetuar prej vitesh në Maldive.Maldive.
