TikTok ka nisur të rikthehet në internet vetëm disa orë pas reagimit të Presidentit të sapozgjedhur, Donald Trump, i cili u angazhua të nënshkruajë një urdhër ekzekutiv për të vonuar ndalimin e aplikacionit në SHBA pas marrjes së detyrës. Rreth 12 orë pas mbylljes për herë të parë, përdoruesit amerikanë kanë rifituar aksesin në TikTok, duke e hapur atë përmes shfletuesve dhe aplikacioneve, megjithëse ende shfaqet një paralajmërim për mbyllje.
Natën e së shtunës, aplikacioni u bë i papërdorshëm për amerikanët, të cilët morën një mesazh që shpjegonte se ai ishte jashtë funksioni për shkak të një ndalimi të vendosur nga Gjykata e Lartë, e cila e pohoi vendimin të premten dhe u kërkoi përdoruesve të “qëndronin të sintonizuar”. Mbyllja e plotë e TikTok u realizua pas disa javësh pasigurie dhe ndikoi në 170 milionë përdorues amerikanë, shumë prej të cilëve përdorin aplikacionin për lajme, argëtim, komunitet dhe, për disa, për të siguruar të ardhura.
Ligji që kërkonte mbylljen e TikTok në SHBA nëse aplikacioni nuk do të ndaheshin nga pronësia kineze, mundësonte që presidenti të vononte zbatimin e tij për 90 ditë përmes një urdhri ekzekutiv. Trump ka treguar se do të firmosë këtë urdhër pas betimit të tij të hënën.
