Tiranë, 18 Maj 2026 – NAITEC, kompania e specializuar në digjitalizimin e proceseve aeroportuale, është përzgjedhur nga Aeroporti Ndërkombëtar i Tiranës, për zhvillimin dhe implementimin e një Sistemi të ri të Menaxhimit të Aeroportit (AMS), i cili do të mbështesë zhvillimin dhe rritjen afatgjatë të aeroportit.
Nën drejtimin e Kastrati Group që prej vitit 2020, Aeroporti Ndërkombëtar i Tiranës ka konsoliduar pozicionin e tij si një qendër rajonale ajrore, duke arritur një volum prej 11.6 milionë pasagjerësh gjatë vitit 2025 — një rritje prej 249% krahasuar me vitin 2019 — dhe duke u konfirmuar si aeroporti lider në Ballkanin Perëndimor.
Rritja e vazhdueshme e trafikut është shoqëruar me investime të rëndësishme në infrastrukturë, zgjerimin e terminalit të pasagjerëve dhe rritjen e kapaciteteve operacionale, me fokus të vazhdueshëm në përmirësimin e eksperiencës së udhëtarëve.
Në këtë kuadër zhvillimi, TIA ka zgjedhur NAITEC si partner strategjik për implementimin e një platforme moderne dhe të integruar, e cila do të automatizojë dhe koordinojë proceset kryesore operacionale të aeroportit në një sistem të vetëm.
Sistemi i ri i Menaxhimit të Aeroportit do të mundësojë koordinim në kohë reale ndërmjet aeroportit, Kontrollit të Trafikut Ajror (ATC), linjave ajrore dhe shërbimeve operacionale si dhe do të përmirësojë menaxhimin e burimeve aeroportuale, duke optimizuar efikasitetin operacional.
Një element kyç i sistemit do të jetë edhe FIDS (Flight Information Display System), përmes të cilit pasagjerët do të marrin informacion të përditësuar në kohë reale mbi mbërritjet, nisjet dhe shërbimet aeroportuale.
Platforma është projektuar si një sistem i automatizuar, i aftë të mbështesë rritjen e vazhdueshme të trafikut ajror dhe zhvillimin modern e të qëndrueshëm të aeroportit në vitet në vijim. Automatizimi i proceseve, duke nisur nga planifikimi sezonal i fluturimeve, do të sigurojë përditësim të vazhdueshëm të planifikimit të burimeve dhe koordinim të plotë ndërmjet të gjithë aktorëve aeroportualë.
Alberto Torresan, CEO i NAITEC u shpreh: Vendimi i Aeroportit Ndërkombëtar të Tiranës për t’u mbështetur te kompania jonë dhe te Sistemi i Menaxhimit Aeroportual që kemi zhvilluar reflekton vizionin e këtij aeroporti, i cili, duke parë drejt së ardhmes, po adopton një platformë digjitale të aftë të mbështesë në mënyrë efektive dhe të vazhdueshme përmirësimin operacional. Me shumë kënaqësi dhe entuziazëm kemi nisur këtë bashkëpunim, i cili do të përfshijë një kalendar intensiv aktivitetesh mes Venecias dhe Tiranës, me synimin për të vënë në zbatim modulet e para të sistemit të ri të menaxhimit deri në muajin qershor, në përputhje me pikun e sezonit veror të fluturimeve.”
Nga ana tjeter Piervittorio Farabbi, Drejtor i Operacioneve në TIA shtoi: Aeroporti Ndërkombëtar i Tiranës ka përzgjedhur NAITEC për zbatimin e një sistemi modern të menaxhimit të aeroportit (AMS), nxitur dhe nga rritja e lartë e trafikut ajror dhe me pritshmërinë për të arritur në 13 milionë pasagjerë në vitin 2026.
TIA — nën investimin e grupit Kastrati — po avancon drejt zgjidhjeve të integruara për të optimizuar operacionet dhe për të siguruar përdorimin efikas të aseteve aeroportuale.
Ekipi teknik i NAITEC ka nisur tashmë instalimin në terren, ndërsa zhvillimi do të vijojë në disa faza duke mbuluar të gjitha aspektet operacionale.
TIA mbetet e përkushtuar ndaj inovacionit dhe ruajtjes së standardeve të larta të shërbimit dhe komoditetit për pasagjerët. Synimi ynë është të jemi një aeroport lider në efikasitet dhe cilësi shërbimi për klientët dhe pasagjerët tanë.”
Rreth NAITEC
Për më shumë se tridhjetë vite, Naitec ka ofruar zgjidhje digjitale moderne për sektorin aeroportual. Shumë aeroporte italiane dhe ndërkombëtare kanë zgjedhur zgjidhjet e saj për të përmirësuar menaxhimin operacional të strukturave të tyre. Kompania ka synuar gjithmonë të garantojë standarde të larta cilësie, besueshmërie dhe sigurie gjatë gjithë ciklit jetësor të produkteve të saj, nga zhvillimi deri te dorëzimi dhe mirëmbajtja e vazhdueshme.
Naitec është pjesë e SAVE Group, një nga grupet lider të aeroporteve në Itali, i cili menaxhon North-East Airport Hub (Venecia, Treviso, Brescia) dhe aeroportin belg të Charleroi-t.
Falë ekspertizës së saj, zgjidhjeve modulare dhe fokusit të fortë te shërbimi, Naitec mbështet digjitalizimin e proceseve aeroportuale, duke garantuar implementim të shpejtë dhe efikasitet operacional.
Rreth AEROPORTIT NDËRKOMBËTAR TË TIRANËS (TIA)
Aeroporti Ndërkombëtar i Tiranës (TIA) është porta kryesore ajrore e Shqipërisë dhe aeroporti më i madh në Ballkanin Perëndimor. Drejtuar nga Grupi Kastrati, TIA ka përjetuar një transformim të jashtëzakonshëm në vitet e fundit falë investimeve të gjera në infrastrukturë dhe përmirësimeve teknologjike. Sot, aeroporti ofron shërbime të avancuara për pasagjerët, kapacitete të rritura dhe ambiente moderne që plotësojnë kërkesën gjithnjë në rritje për udhëtime.
