Hapet thirrja e dytë për subvencionimin e 2000 familjeve për vendosjen e paneleve diellore për ngrohjen e ujit.
Ministrja e Infrastrukturës dhe Energjisë Belinda Balluku deklaroi se procesi do të kalojë në dy faza. Pas përzgjedhjes së subjekteve që do të ofrojnë instalime dhe panele diellore, abonentët familjarë që duan të pajisen me panele diellore duhet të aplikojnë duke filluar nga 24 shkurti. Subvencionimi do të mbulohet 70% nga fondet e krijuara nga Agjencisë së Eficiencës së Energjisë.
“Ministria e infrastrukturës Energjisë, Agjencia e Eficiencës së Energjisë kanë vendosur që të lancojnë paketën e dytë me 2000 unite të tjera, të cilat do të jenë të disponuesmë për të gjithë ata qytetarë që dëshirojnë që në banesën e tyre të vendosin panele diellore për ngrohjen e ujit, duke marrë parasysh se këto panele do të ulin faturën e tyre të energjisë me të paktën 20 për qind.
Duke nisur nga 4 shkurt, ne do të ndajmë këtë proces në dy faza. Duke nisur nga sot të gjitha ato subjekte që dëshirojnë të ofrojnë shërbime, pra instalime dhe panele diellore për të gjithë familjarët, duhet të fillojnë të aplikojnë në faqen e Agjencisë së Eficiencës së Energjisë.
Dhe më pas nis faza e dytë, më 24 shkurt të gjithë abonentët familjarë që kanë dëshirë të pajisen me këto panele diellore, të cilat subvencionohen 70% nga fondet e krijuara nga Agjencia mund të bëjnë aplikimin e tyre, duke pasur parasysh që janë të disponueshme 2000 unite për tu përdorur në këtë paketë të dytë”, deklaroi Balluku.
“Fatura e energjisë na vjen deri në 50 për qind më pak”, tha një qytetar në Farkë që ka përfituar nga subvencionimi në vitin 2022.
Në thirrjen e parë përfituan nga subvencionimi 1981 familje.
