Përplasja mes Javier Tebas dhe Real Madridit vazhdon të ashpërsohet. Vetëm pak orë pas komunikatës së klubit madrilen, presidenti i La Ligës reagoi publikisht duke iu përgjigjur pikë për pikë akuzave për mungesë neutraliteti.
“Përfaqësimi i të gjitha klubeve nuk do të thotë t’i bindesh më të fuqishmit”, shkroi Tebas, duke këmbëngulur se kritikat ndaj arbitrimit janë legjitime, por se një gjë tjetër është “ta kthesh çdo padrejtësi të perceptuar në provë të një përndjekjeje”.
Ai iu rikthye gjithashtu Real Madrid TV, duke akuzuar klubin se prej vitesh promovon idenë e një kampionati të manipuluar. “Prej vitesh flasin javë pas jave për një ligë të manipuluar. A krijon kjo besim apo dëmton imazhin e futbollit spanjoll?”, ishte një nga pyetjet e tij.
Tebas kundërshtoi edhe kërkesën e Real Madridit për një drejtim më “neutral” të La Ligës. Sipas tij, neutraliteti nuk duhet ngatërruar me heqjen dorë nga qëndrimet: “Pavarësia do të thotë të marrësh vendime pa presione, duke zbatuar të njëjtat rregulla për të gjithë, edhe kur Real Madridit nuk i pëlqejnë.”
Në fund, presidenti i La Ligës e mbylli reagimin me një mesazh të drejtpërdrejtë: “Unë nuk jam pronari i La Ligës dhe nuk do ta drejtoj sikur t’i përkiste një klubi të vetëm. Respekt për të gjithë, nënshtrim ndaj askujt.”
Reagimi vjen pasi Real Madridi e akuzoi Tebas për një “obsesion” ndaj klubit, e cilësoi sjelljen e tij “të padenjë për një drejtues me përgjegjësi” dhe kërkoi një drejtim që të garantojë neutralitetin e kompeticionit.
