Këshilli i Ministrave ka miratuar të enjten një vendim që përcakton standardet e sigurisë dhe rregullat për sipërfaqet e kultivimit dhe përpunimit të kanabisit për qëllime mjekësore në Shqipëri.
Subjektet që kërkojnë licencë për kultivimin e kanabisit mjekësor duhet të sigurojnë monitorim të vazhdueshëm me kamera me rezolucion të lartë dhe ruajtje të të dhënave filmike deri në një vit në servera “Cloud” brenda Bashkimit Evropian.
Po ashtu, mjediset duhet të rrethohen me mure betoni 4 metra të lartë dhe tela gjembash, si për ambientet e hapura ashtu edhe për ato të mbrojtura.
Siguria do të sigurohet 24 orë nga subjekte të specializuara, të licencuara sipas legjislacionit në fuqi, duke përdorur gjithashtu pajisje teknologjike të avancuara për monitorimin dhe parandalimin e hyrjeve të paautorizuara.
Vendimi gjithashtu rregullon transportin e lëndëve të para dhe produkteve të gatshme nga subjektet e licencuara.
