“Inxhinierja që u bë deputete”, Luljeta Bozo, ka zbuluar në një emision televiziv se pse nuk është në listat për deputete për zgjedhjet e 11 majit.
“Ishte zgjedhja ime për të mos qenë kandidate në 11 maj sepse mendova se 4 vjet… e para nuk jam një vajzë e re edhe pse truri më punon sahat, por çdo punë do energjinë e vet dhe njeriu duhet ta dijë, lërë të tjerët të vazhdojnë. Nuk ka nevojë të zësh vendin e deputetit kur ke të tjerë të rinj shumë të mirë.
Në takimet me Ramën, ata të rinj ishin shumë të përgatitur dhe të rritur në familje me një botëkuptim tjetër. Ishin me qëllime shumë të qarta dhe mua kjo më pëlqen”, tha Bozo.
“Nuk u bë deti kos” – Shpërthen deputetja Luljeta Bozo për arrestimet e socialistëve: Respektoni ligjin, mos vidhni!
E ftuar në emisionin “Off the Record” me Andrea Danglli deputetja Luljeta Bozo, ndët të tjera, rrëfeu nga se është zhgënjyer gjatë 4 viteve si deputete në Kuvend.
“Mua më ka zhgënjyer fakti që në një pjesë të seancave është bërë një shfaqje e shëmtuar. Atje nuk mund të quhesh që ke njerëzit më të mirë, më të zgjedhurit nga populli, pasi atje luftohej me karrige e shashka. Njeriu lufton me argumente, me fjalën. Gjithmonë ka të meta edhe nga mazhoranca”.
Sa i përket socialistëve që kanë pasur probleme me drejtësinë gjatë këtij mandati, ajo u shpreh: “Secili mëndë në kokë i ka dhe të punojë në mënyrë të ndershme. Po i shkeli rregullat le të përgjigjen. Nëse iu merr koka erë, ja ku është drejtësia dhe ua rregullon qefin. Shyqyr që drejtësia arriti që të jetë pushtet i pavarur. Kjo është gjë shumë pozitive. Nëse shkel ligjin përgjigju. Kujton se u bë deti kos dhe mund të bësh çfarë të duash. Unë jam e kënaqur që drejtësia më në fund po thotë fjalën e saj. Njerëzit duhet të kenë frikë nga ligji dhe ta zbatojnë. E shkele? Do të përgjigjesh”, tha Bozdo në “Off the Record”.
“Pensionistët s’po vdesin, unë s’vij nga hëna” – Luljeta Bozo: Ne jemi mësuar të kursejmë, s’e kemi problem
Luljeta Bozo, inxhinierja që u bë deputete, ishte e ftuar në emisionin “Off the Record” me Andrea Dangllin mbrëmjen e së dielës në A2 CNN, nga ku ndër të tjera tregoi si pranoi të bëhet deputete. Bozo zbuloi se kishte dy objektiva.
“Unë pranova të bëhem deputete me dy objektiva. Të parën kisha objektivin që të bëjë sa mund të bëjë një njeri, të lëvizë me atë fuqi që mund t’i japë posti në drejtim të pensionistëve, të cilët janë një shtresë që ka punuar shumë për Shqipërinë, kanë punuar me pasion të madh. Sot janë një shtresë që nuk shpërblehen për atë që kanë bërë.
Ata nuk janë pak, por një e treta e popullsisë. Në të gjithë botën punojnë 4-5 veta që të hajë një pensionist. Tek ne janë një ose dy veta që të hajë një pensionist. Ka një defekt të madh që nuk korrigjohet me sustë. Njerëzit kanë punuar në të zezë, kështu nuk del pensioni. Skema kështu është në të gjithë botën. Ky nuk është një objektiv i arritur, por ka hyrë në rrugën e duhur.
Objektivi i dytë ishte pas tërmetit të vitit 2019 ku nuk do të ishin bërë të gjitha ato shkatërrime nëse në treg do të kishin dalë profesionistët. Nuk janë në atë tabelë elektronike. Ky grupi i madh që janë në licenca do të kalojë në këtë treg, atë të tjerët duhet të japin një provim”, tha Bozo.
