Paris Saint-Germain ka mposhtur Barcelonën 4-2 në “Parc des Princes”, duke i shkaktuar skuadrës së Hansi Flick humbjen e parë të sezonit.
PSG ishte superior në pjesën e parë dhe krijoi një numër të madh rastesh, ndërsa Joan García u kthye në protagonist për katalanasit me disa ndërhyrje vendimtare.
Avantazhi i vendasve erdhi në minutën e 38-të. Désiré Doué goditi saktë nga jashtë zonës dhe mposhti portierin e Barcelonës për 1-0.
Skuadra e Flick reagoi falë një aksioni të bukur të ndërtuar nga Pedri. Mesfushori spanjoll nxori në krah Xavi Espart, i cili finalizoi fuqishëm dhe vendosi baraspeshën.
Në pjesën e dytë, Luis Enrique dhe PSG shtuan presionin. Pas një goditjeje nga këndi, Lucas Hernández fitoi duelin ajror dhe realizoi golin e dytë të parisienëve.
Barcelona nuk u dorëzua. Në minutat e fundit, Lamine Yamal mori përsipër skuadrën, kaloi disa kundërshtarë dhe shënoi nga një kënd shumë i vështirë për rezultatin 2-2.
Por festa e katalanasve zgjati shumë pak. Në aksionin pasues, Vitinha riktheu PSG-në në avantazh, ndërsa Fabián Ruiz realizoi edhe golin e katërt për të vulosur fitoren 4-2.
Ndeshja u zhvillua në një atmosferë tepër të tensionuar, ndërsa Barcelona pritet të denoncojë edhe një pankartë të shfaqur nga tifozët vendas gjatë himnit të Champions League, ku paraqitej logoja e PSG-së duke shkatërruar atë të klubit katalanas me një motosharë.
Pas kësaj disfate, Barcelona rikthehet menjëherë te përgatitjet për El Clásicon ndaj Real Madridit, ndërsa PSG vazhdon të konfirmojë ambiciet e mëdha në Champions League.
