Ceremonia e ndarjes së çmimeve Academy Awards do të zhvillohet të dielën, me një garë të fortë mes filmave dhe aktorëve të nominuar. Një nga pretendentët kryesorë është filmi Sinners i regjisorit Ryan Coogler, i cili ndërthur muzikën blues me elemente horror dhe rrëfen historinë e Deltës së Misisipit në vitet 1930. Regjisori ka treguar se pasioni për përzierjen e shijeve dhe ideve i ka lindur që në fëmijëri, kur eksperimentonte me pijet në kinema.
Filmi i animuar Zootopia 2 është nominuari me fitimet më të larta këtë vit, me rreth 1.86 miliardë dollarë në të gjithë botën. Në Evropë, ai njihet si Zootropolis për shkak të një marke tregtare të regjistruar më parë në Bashkimin Evropian.
Ky vit ka sjellë edhe disa rekorde të reja në industrinë e filmit:
-Emma Stone, në moshën 37-vjeçare, është gruaja më e re që ka marrë shtatë nominime për Oscar, duke kaluar rekordin e Meryl Streep.
-Timothee Chalamet është aktori më i ri që nga Marlon Brando që ka arritur tre nominime për aktrim në këtë moshë.
-Leonardo DiCaprio, me filmin e tij të fundit, ka arritur që të jetë pjesë e 12 filmave të nominuar për çmimin “Filmi më i mirë”, duke barazuar rekordin e Robert De Niro.
Përshtatja filmike e romanit klasik Frankenstein nga regjisori Guillermo del Toro për Netflix vjen pas më shumë se dy shekujsh nga botimi i librit origjinal, duke shënuar një nga diferencat më të mëdha kohore mes një libri dhe adaptimit të tij në film.
Ceremonia e këtij viti pritet të jetë një nga më të paparashikueshmet e viteve të fundit, me disa kategori ku favoritët janë shumë pranë njëri-tjetrit dhe rezultati mbetet i hapur deri në momentin e fundit.
