Aurélien Tchouaméni do të vazhdojë aventurën te Real Madrid. Mesfushori francez pritet të nisë sezonin 2026-27 me kontratë të re, duke konfirmuar dëshirën e tij për të qëndruar në “Santiago Bernabeu”.
Marrëveshja mes palëve është arritur pa vështirësi, pasi si lojtari, ashtu edhe klubi, kishin të njëjtin qëllim: vazhdimin e bashkëpunimit. Kontrata e re pritet të zgjasë edhe pesë sezone të tjera, duke i dhënë Tchouaménit mundësinë të konsolidohet si një nga pikat kryesore të mesfushës madrilene.
Sipas raportimeve, paga e re e francezit do të jetë rreth 9 milionë euro neto në sezon. Ndryshe nga zërat e fundit, shifra nuk do të kalojë 10 milionë euro dhe nuk do të arrijë në 13 milionë euro, siç ishte përfolur.
Real Madrid nuk ka marrë në konsideratë ofertat apo interesimet nga klube të tjera, përfshirë Manchester United. Në klub nuk është diskutuar asnjëherë seriozisht mundësia e largimit të lojtarit, pasi Tchouaméni shihet si pjesë e rëndësishme e projektit.
Edhe trajneri e vlerëson shumë mesfushorin francez, duke e konsideruar një lojtar me aftësi për të kontrolluar lojën dhe për të mbajtur ekuilibrin e skuadrës në mesfushë.
Tchouaméni, nga ana e tij, ka qenë gjithmonë i qartë: dëshira e tij ishte të vazhdonte me Real Madridin. Ai ndihet i lidhur me klubin, qytetin dhe gjithçka që përfaqëson institucioni madrilen.
Me këtë rinovim, Real Madrid konfirmon besimin te një lojtar për të cilin investoi shumë që në vitin 2022, kur e transferoi nga Monaco pas garës me disa klube të mëdha europiane.
