Të paktën 14 persona kanë humbur jetën dhe shumë të tjerë janë plagosur si pasojë e stuhive të pazakonta, të shoqëruara me reshje të dendura shiu dhe erëra të fuqishme, që goditën shtetin perëndimor të Gujaratit në Indi.
Sipas autoriteteve lokale, reshje janë regjistruar në 168 nga 253 nën-distriktet e shtetit gjatë 24 orëve të fundit. Stuhitë kanë shkaktuar dëme të shumta materiale dhe humbje në jetë, kryesisht për shkak të rrëzimit të pemëve, shembjes së strukturave të ndryshme, goditjeve elektrike dhe rrufeve.
Dëmet janë ndjerë veçanërisht në sektorin bujqësor, ku banorët raportojnë se erërat e fuqishme kanë shkatërruar pemishtet me mango dhe kanë dëmtuar rëndë sipërfaqe të mëdha tokash të punuara.
Departamenti Meteorologjik i Indisë ka paralajmëruar se moti i keq pritet të vazhdojë, me stuhitë që shoqërohen nga vetëtima dhe erëra që arrijnë shpejtësi nga 50 deri në 60 kilometra në orë, duke përfshirë shumë rajone të Gujaratit edhe në ditët në vijim.
