Spanja e nisi Kupën e Botës 2026 me një rezultat zhgënjyes, duke barazuar 0-0 ndaj Cabo Verde në ndeshjen e parë të Grupit H, të zhvilluar në “Mercedes-Benz Stadium”.
Skuadra e Luis de la Fuente vinte në këtë turne si një nga favoritet kryesore për trofeun, por nuk arriti të thyente debutuesit afrikanë, të cilët u mbrojtën me shumë disiplinë dhe morën një pikë historike.
Spanja kontrolloi lojën dhe mbajti më shumë topin, por vuajti shumë në metrat e fundit. Ferran Torres goditi traversën në pjesën e parë, ndërsa portieri Vozinha ishte vendimtar me disa ndërhyrje të rëndësishme, përfshirë edhe një pritje ndaj Laportes para pushimit.
Në pjesën e dytë, De la Fuente hodhi në fushë Lamine Yamal, Dani Olmo dhe Nico Williams për të ndryshuar ritmin e lojës, por as këto lëvizje nuk mjaftuan për të gjetur golin.
Madje në fund, Cabo Verde pati disa kundërsulme të rrezikshme dhe mund ta kishte ndëshkuar Spanjën, por sfida u mbyll pa gola.
Një debutim i hidhur për Spanjën, që humbet dy pikë të rëndësishme që në ndeshjen e parë, ndërsa Cabo Verde feston një rezultat të madh në paraqitjen e saj të parë në Botëror.
