Spanja nuk e nisi Botërorin 2026 ashtu siç pritej. Skuadra e Luis de la Fuente, një nga favoritet për fitimin e trofeut, u ndal në barazim 0-0 ndaj Cabo Verde, në një ndeshje ku dominoi topin, por nuk arriti të gjente rrugën e golit.
Pas ndeshjes, brenda kampit spanjoll ka nisur analiza për të kuptuar çfarë nuk funksionoi. Sipas Antón Meana, lojtarët nuk e shohin problemin te gjendja fizike, por te mungesa e shpejtësisë mendore dhe leximit të lojës.
“Lojtarët mendojnë se u mungoi freskia mendore. Nuk ishte aq shumë problem fizik, por më shumë mungesë leximi e lojës dhe reagimi i shpejtë në momente të caktuara”, u shpreh Meana në Cadena SER.
Ky shqetësim bëhet edhe më i rëndësishëm përpara ndeshjes së radhës ndaj Arabisë Saudite, një kundërshtar që pritet të mbrohet ulët, njësoj si Cabo Verde. Për këtë arsye, Spanja duhet të gjejë zgjidhje më të shpejta në sulm dhe të mos bllokohet përballë ekipeve që mbyllen pas.
Pas një dite pushimi me familjet, lojtarët do të rikthehen menjëherë në stërvitje me fokus të plotë te sfida e së dielës. Brenda ekipit ka bindje se problemi mund të rregullohet, pasi nuk lidhet me lodhjen fizike.
Megjithatë, jo të gjithë e shohin situatën kaq thjesht. Antonio Romero theksoi se disa lojtarë nuk ishin në nivelin e pritur, duke përmendur raste ku Oyarzabal, Gavi dhe Rodri u dukën më të ngadaltë dhe jo aq të saktë sa zakonisht.
Spanja mbetet një nga skuadrat më të forta të turneut, por barazimi ndaj Cabo Verde ka ndezur sinjalin e parë të alarmit. Tani, ndaj Arabisë Saudite, kampionët e Evropës duhet të tregojnë se ishte vetëm një hap fals.
