Ambasadorja e Francës në Shqipëri, Catherine Suard, ka mbajtur një deklaratë për mediat gjatë një vizite në Korçë, duke u fokusuar në çështje të rëndësishme si ligji për barazinë gjinore, raportin e Këshillit të Europës dhe punën e Prokurorisë Speciale, SPAK.
Ajo theksoi rëndësinë e të drejtave të njeriut dhe barazisë gjinore, duke thënë se këto janë vlerat thelbësore të Bashkimit Europian. “Të drejtat e njeriut dhe mosdiskriminimi janë zemra e ligjeve të BE,” vuri në dukje Suard, duke shprehur mbështetje ndaj reformave që synojnë të përmirësojnë këtë situatë.
Ambasadorja iu referua raportit të fundit të Këshillit të Europës, duke e përshkruar atë si pozitiv. Ajo theksoi se raporti ilustron progresin e arritur nga Shqipëria, i njohur edhe nga autoritete të tjera, përfshirë NATO-n dhe BE-në. Megjithatë, ajo u shpreh se duhen ende hapa të tjera përpara, veçanërisht në zbatimin e ligjeve dhe reformave. “Kontrolli mbi implementimin e këtyre ligjeve mbetet një sfidë,” theksoi ajo.
Suard theksoi gjithashtu rëndësinë e bashkëpunimit nga të gjitha palët, përfshirë klasën politike dhe parlamentin, për të arritur objektivat e vendit. Ajo shprehu besim se Shqipëria do të arrijë këto qëllime dhe se Franca është e gatshme të ndihmojë në këtë rrugëtim të vështirë.
Në lidhje me SPAK, ambasadorja e vlerësoi atë si një mjet të jashtëzakonshëm brenda reformës së drejtësisë në Shqipëri. Ajo theksoi se SPAK-i ka zhvilluar një bashkëpunim të ngushtë me sistemet e sigurisë dhe të drejtësisë, duke shërbyer si një indikator i rëndësishëm për cilësinë e drejtësisë në vend. “Shpresoj se SPAK do të vazhdojë të përmirësojë funksionimin e tij,” përfundoi Suard.
Deklaratat e ambasadores theksojnë angazhimin e Francës për të mbështetur Shqipërinë në rrugën e saj drejt integrimit europian dhe forcimin e institucioneve të saj demokratike.
