Një hat-trick i norvegjezit Alexander Sørloth i hapi Atlético Madrid rrugën drejt 1/8-ave, në një mbrëmje të fortë ndaj Club Brugge KV. Përveç tre golave të Sørloth, vendimtar ishte edhe Johnny Cardoso, i cili shënoi golin e dytë për të rikthyer qetësinë dhe kontrollin e ndeshjes.
Pas një jave nga sfida e parë, Diego Simeone bëri ndryshime në formacion, duke aktivizuar Cardoso, Sørloth dhe Baena, ndërsa Griezmann dhe Lookman nisën nga stoli. Brugge hyri pa komplekse dhe u shfaq i rrezikshëm sidomos me Forbs, duke shfrytëzuar hapësirat në krah.
Atletico gjeti golin e parë me një aksion të gjatë që nisi nga portieri Jan Oblak: topi shkoi te Sørloth, i cili fitoi duelin fizik dhe goditi fort, duke mposhtur Mignolet për 1-0. Por epërsia zgjati pak: Brugge barazoi nga një goditje këndi, ndërsa Oblak u detyrua të bënte një pritje “mrekulli” për ta mbajtur ekipin në lojë.
Në startin e pjesës së dytë, Cardoso shpërtheu me një goditje të fuqishme dhe e ktheu Atleticon në avantazh 2-1, duke i dhënë frymëmarrje Metropolitano-s. Më pas Simeone kërkoi presion më të lartë, ndërsa nga stoli hynë Griezmann dhe Lookman për të rritur forcën sulmuese.
Gjiganti norvegjez e vulosi ndeshjen pas një kundërsulmi të shpejtë dhe krosimit të Lookman: Sørloth shënoi sërish, duke e çuar rezultatin fillimisht në 3-1 dhe më pas në 4-1. Kështu, Atlético siguroi kualifikimin dhe e ktheu mbrëmjen në festë, ndërsa tani i kthen sytë nga 1/8-at.
