Këshilltari i PS-së në Njësinë Administrative nr. 4 në Tiranë, Gjergji Ogreni, ka komentuar protestat kombëtare që po zhvillohen prej 49 ditësh në vend.
Sipas Ogrenit, i cili më herët ka deklaruar se idhulli i tij është kryeministri Edi Rama, protestuesit nuk kanë arsye të dalin në protestë.
I ftuar në “Report TV”, këshilltari socialist tha se shumë prej protestuesve ankohen se nuk u mjafton paga, por sipas tij, kjo vjen si pasojë e menaxhimit të dobët të të ardhurave dhe nuk është përgjegjësi e qeverisë.
Po ashtu, ai u shpreh se një sërë problematikash, duke nisur nga infrastruktura rrugore, janë zgjidhur në Tiranë.
Gjergji Ogreni tha: Ne jemi në terren, duke parë, duke dëgjuar dhe duke mbledhur të dhëna. Ka pasur disa probleme të caktuara me rrugët, por ato janë zgjidhur, të paktën në disa zona të Tiranës.
Po për çfarë kanë dalë? Për të kërkuar dorëheqje? Ka një sërë problematikash që vijnë nga terreni, sepse ne vijmë nga terreni. Ai që ka dalë në protestë, ka dalë për arsye të ndryshme.
Dikush thotë: ‘Nuk më del rroga’. Këtë nuk mund ta zgjidh unë. Nëse nuk i del rroga, do të thotë që e keqmenaxhon atë që ka. Të flasim për realitetin: paga bruto është dyfishuar. Ka qenë 415 mijë lekë, ndërsa tani është 900 e ca.
