Humbja ndaj Real Madridit në El Clásico ka sjellë një javë të trazuar te Barcelona, me Hansi Flick që është vendosur nën presion në disa fronte, nga menaxhimi i skuadrës deri te problemet taktike.
Barça erdhi në këtë situatë pas dy humbjeve radhazi, ndaj PSG-së dhe Real Madridit. Në El Clásico, skuadra e Flick u shfaq e çorganizuar në disa momente, ndërsa trajneri gjerman e lidhi paraqitjen edhe me mungesën e freskisë fizike.
Megjithatë, zhvillimet e ditëve të fundit tregojnë se klubi po kërkon një reagim. Të mërkurën u organizua një drekë e përbashkët e skuadrës, ndërsa një ditë më vonë drejtuesit e Barcelonës shprehën publikisht “besim të plotë te skuadra dhe stafi teknik”.
Flick gjithashtu ka hapur derën për përforcime gjatë merkatos së janarit, një çështje që prej verës ishte lënë në plan të dytë.
Edhe Lamine Yamal është përfshirë në debat, pasi është kritikuar për udhëtimin e tij individual drejt Londrës të dielën në mbrëmje, përpara udhëtimit zyrtar të organizuar nga klubi.
Por shqetësimi më i madh mbetet ai që e ka shoqëruar Barcelonën edhe më parë: menaxhimi i momenteve vendimtare të ndeshjeve. Të njëjtat probleme ishin shfaqur edhe në përballje të mëdha ndaj Interit dhe Atlético Madridit.
Megjithatë, Flick ka kaluar edhe më parë periudha të vështira te Barcelona dhe deri tani ka arritur gjithmonë të reagojë. Pas krizave të mëparshme kanë ardhur diskutime të brendshme, takime mes lojtarëve dhe më pas përmirësim i rezultateve.
Tani mbetet për t’u parë nëse humbja në El Clásico ishte thjesht një tjetër moment i vështirë për t’u kaluar, apo fillimi i një problemi më të thellë për Barcelonën e Flick.
