Lotaria Amerikane për vitin 2027 do të vijojë të mbetet e pezulluar. Gjykata Federale e Apelit në Shtetet e Bashkuara ka vendosur të enjten, më 29 tetor, të bllokojë përkohësisht vendimin që detyronte administratën e presidentit Donald Trump të rihapte aplikimet për programin e Green Card.
Vendimi i ri i jep mundësi administratës amerikane të mbajë të pezulluar procesin e regjistrimit, deri në shqyrtimin e mëtejshëm të çështjes në apel. Për rrjedhojë, aplikimet për Lotarinë Amerikane DV-2027 nuk do të hapen më 1 nëntor, siç ishte parashikuar pas vendimit të mëparshëm gjyqësor.
Më 14 tetor, një gjykatë federale në Kaliforni kishte urdhëruar Departamentin Amerikan të Shtetit të rifillonte programin DV-2027, pas një padie të ngritur nga firma ligjore Red Eagle Law. Sipas këtij vendimi, autoritetet duhej të publikonin datat e regjistrimit deri më 29 tetor dhe të nisnin aplikimet jo më vonë se 1 nëntori.
Por administrata Trump e kundërshtoi vendimin dhe iu drejtua Gjykatës së Apelit, e cila pranoi kërkesën urgjente të qeverisë dhe pezulloi zbatimin e urdhrit për rihapjen e programit.
Megjithatë, vendimi i fundit nuk nënkupton anulimin përfundimtar të Lotarisë Amerikane 2027. Ai thjesht lejon që procesi të mbetet i bllokuar deri në një vendimmarrje të mëtejshme gjyqësore. Për momentin nuk ka një datë të re për hapjen e aplikimeve.
Programi amerikan Diversity Visa parashikon dhënien e deri në 55 mijë vizave të emigrimit në vit për qytetarë nga vende me nivele relativisht të ulëta emigracioni drejt Shteteve të Bashkuara.
Vendimi i fundit shton pasigurinë për mijëra qytetarë shqiptarë që prisnin të aplikonin këtë vit, ndërsa mbetet për t’u parë se kur do të ketë një zhvillim të ri për programin e shumëpritur të emigrimit drejt SHBA-ve.
