Opozita ka braktisur sallën e seancave plenare në punimet e kësaj të marte, menjëherë sapo kryetari Niko Peleshi njoftoi se kishte ardhur koha që deputetët të miratonin ndryshimet e propozuara për Rregulloren e funksionimit të Kuvendit të Shqipërisë.
Lideri demokrat Sali Berisha përfundoi fjalën në foltore dhe menjëherë pas akuzave ndaj mazhorancës, ftoi të vetët të braktisnin sallën.
Pavarësisht vendimit të opozitës, socialistët kanë konfirmuar prezencën në sallë dhe kanë miratuar Rregulloren e re. Siç deklaroi kryetari Niko Peleshi, të pranishëm në momentin e votimit me kartonë dhe elektronikë ishin 79 deputetë.
Ata kanë dhënë dritën jeshile për ngritjen e 11 Komisioneve të përhershme, siç u propozua nga klryeministri Edi Rama në Asamblenë Kombëtare të Partisë Socialiste. Nga ana tjetër, opozita i kundërshton dhe ka vënë në dijeni dhe ndërkombëtarët.
Projektvendimi “Për miratimin e Rregullores së Kuvendit të Republikës së Shqipërisë”, është miratuar me 79 vota Pro, duke përfshirë deputetët me kartonë dhe elektronikë, ndërsa Abstenim dhe Kundër nuk kishte.
Edhe Projektvendimi “Për zgjedhjen e zëvendeskryetarëve të Kuvendit”, i cili kërkonte shumicë të thjeshtë, u miratua me 79 vota Pro dhe asnjë Kundër e asnjë Abstenim.
Njëlloj morën dritën jeshile të socialistëve edhe dy projektvendimet e fundit, respektivisht Projektvendimi “Per zgjedhjen e sekretariateve të Byrosë të Kuvendit” dhe Projektvendimi “Per përbërjen e Byrosë të Kuvendit”, me 79 vota Pro, 0 Abstenim dhe 0 Kundër.
Kryetari Niko Peleshi në përfundim të votimit deklaroi përfundimin e seancës plenare vetëm me prezencën e socialistëve, ndërkohë që deputetët do të mblidhen sërish në orën 17:00. Mbetet për t’u parë nëse opozita do të rikthehet në vendet e saj, pasi u largua që në seancën e votimit.
