Arne Slot ka pranuar se Liverpool nuk ka asnjë shans ndaj Paris Saint-Germain nëse skuadra nuk paraqitet në nivel maksimal për të gjithë 90 minutat. Trajneri holandez reagoi kështu para çerekfinales së parë të Champions League në Paris, duke mos rënë plotësisht dakord me komentet e Virgil van Dijk, i cili pas humbjes 4-0 ndaj Manchester City kishte lënë të kuptohej se skuadra u dorëzua në një moment të ndeshjes.
Slot theksoi se nuk e pa ekipin të hiqte dorë, por shtoi se e vlerëson reagimin e fortë të kapitenit. Sipas tij, Liverpool ka kaluar shpesh momente negative këtë sezon dhe humbja ndaj City ishte një goditje e madhe, jo vetëm për rezultatin, por edhe sepse erdhi në një çerekfinale të rëndësishme të FA Cup kundër një rivali direkt.
Trajneri i Liverpool dha edhe një paralajmërim të qartë para përballjes me PSG. Ai tha se, nëse skuadra përsërit në Paris ato 20 minuta katastrofike që pati ndaj Manchester City, atëherë mund të pësojë sërish katër gola. Për këtë arsye, ai kërkon që ekipi të ruajë nivelin e 35 minutave të para të asaj ndeshjeje nga sekonda e parë deri në të fundit.
Pavarësisht presionit të madh, Slot u shpreh se Liverpool ka treguar edhe më parë se di të reagojë pas goditjeve të forta. Ai kujtoi historinë e klubit dhe karakterin që kjo skuadër ka treguar në ndeshje të mëdha, duke insistuar se Liverpool është ende i aftë të rivalizojë me ekipet më të mira të Europës.
Edhe Florian Wirtz doli në mbështetje të trajnerit, duke theksuar se skuadra beson te Slot. Mesfushori gjerman kujtoi se Liverpool fitoi kampionatin sezonin e kaluar dhe ka zhvilluar shumë ndeshje të mira edhe këtë edicion, ndaj ende ka arsye për të besuar se sezoni mund të shpëtohet.
Nga ana tjetër, PSG mbetet një kundërshtar shumë i rrezikshëm. Kampionët e Europës kanë krijuar reputacion si skuadër që di të mposhtë ekipet angleze dhe po tregojnë sërish forcë edhe këtë sezon. Në raundin e kaluar, ata kaluan me autoritet ndaj Chelsea me rezultatin e përgjithshëm 8-2.
Një lajm pozitiv për Liverpool është rikthimi i Alexander Isak. Sulmuesi, i cili ka munguar që nga dhjetori pas një operacioni në kyçin e këmbës, ka udhëtuar me ekipin drejt Parisit dhe mund të luajë. Slot konfirmoi se, nëse e ka marrë me vete, atëherë ai mund të japë kontribut, ndërsa priten edhe ndryshime në formacion, me Jeremie Frimpong dhe Alexis Mac Allister që mund të rikthehen.
