Më 10 janar 2025, në Shqipëri ka hyrë në treg 180 kg kallamar i importuar nga Italia, i cili përbën rrezik për konsumatorët për shkak të përmbajtjes së kadmiumit.
Kadmiumi është një metal i rëndë me efekte toksike, i cili mund të grumbullohet në trup dhe me kalimin e kohës të dëmtojë veshkat, mëlçinë dhe sistemin nervor, duke rritur gjithashtu mundësinë për zhvillimin e sëmundjeve kronike.
Prania e këtij metali të rrezikshëm në kallamar është konstatuar pas analizave të autoriteteve italiane, të cilat njoftuan edhe autoritetet shqiptare për të tërhequr produktin nga tregu.
Sipas Agjencisë Kombëtare të Ushqimit, të cilës i është drejtuar “Ora News”, sasia e importuar ka qenë 180 kilogramë dhe produkti ka afat përdorimi deri në gusht 2026.
Kontrollet e inspektorëve të AKU-së nuk arritën të ndalonin qarkullimin e produktit, pasi e gjithë sasia ishte shitur tashmë.
Burime zyrtare kanë bërë të ditur se kallamari me përmbajtje kadmiumi është shpërndarë në shtatë restorante në qarkun e Vlorës dhe në një lokal në Fier.
Ndërkohë që skandalet në sektorin ushqimor vazhdojnë, drejtuesi i AKU-së, Manush Kullolli, është shprehur i shqetësuar më tepër për imazhin e bizneseve private se sa për sigurinë e konsumatorëve.
AKU ka refuzuar të japë informacion mbi emrin e importuesit, ndonëse ligji e detyron ta bëjë një gjë të tillë.
Në përgjigjen zyrtare, AKU ka theksuar se nuk ka si mision publikimin e emrave tregtarë apo të markave, por vetëm garantimin e sigurisë ushqimore.
Në fakt, pika 3 e nenit 3 të Ligjit “Për të Drejtën e Informimit” përcakton qartë se çdo qytetar ka të drejtë të marrë informacion publik përmes dokumentacionit origjinal ose në një format që siguron qasje të plotë.
