Një akt i rëndë vandalizmi ka tronditur Madeirën, ku një person ende i paidentifikuar i ka vënë flakën statujës prej bronzi të Cristiano Ronaldos, pranë muzeut CR7. Sipas raportimeve, autori iu afrua monumentit, e spërkati me benzinë dhe më pas i vuri flakën, ndërsa e regjistronte ngjarjen me video.
Në pamjet e publikuara, autori shihet duke u larguar disa hapa dhe duke reaguar në mënyrë provokuese përpara monumentit në flakë. Videoja shoqërohej me një mbishkrim të pazakontë: “Kjo është paralajmërimi i fundit nga Zoti”, si edhe me etiketimin e llogarisë së Ronaldos në Instagram.
Statuja u inaugurua në vitin 2014 nga autoritetet lokale të Madeirës dhe kjo raportohet të jetë hera e dytë që ajo sulmohet. Policia në Madeira ka nisur kërkimet për autorin dhe po heton motivet e ngjarjes, me synim identifikimin dhe vënien para përgjegjësisë ligjore.
