Punëtorë turq të punësuar pa leje qëndrimi e pune
Një tjetër skandal ka shpërthyer rreth projektit të rikonstruksionit të “Camp Nou”-t, stadiumit të Barcelonës.
Sipas “Marca”-s, një inspektim i punës ka zbuluar 79 punëtorë turq që punonin në kantier pa lejet e nevojshme. Hetimi i autoritetit të punës Treball ka nxjerrë në pah se punonjësit e punësuar nga nënkontraktori Extreme Works kishin muaj që punonin në Barcelonë pa dokumentacion të rregullt ligjor.
Kompania Extreme Works, e cila siguronte saldatorë, elektriçistë dhe teknikë specialistë për kantierin, është gjobitur me 1.09 milionë euro. Pas nisjes së hetimeve, kompania i ka pushuar nga puna të gjithë punëtorët e përfshirë dhe i ka dërguar sërish në Turqi – megjithëse disa prej tyre nuk janë kthyer kurrë në vend. Ky nuk është rasti i parë shkeljesh me punëtorë të huaj në kantierin e “Camp Nou”-t: në total, gjobat kanë arritur tashmë në rreth 3 milionë euro, ndërsa mbi 200 raste të tjera janë në shqyrtim.
Vetë punëtorët pretendojnë se janë mashtruar. Ata thonë se u është premtuar punësim i rregullt dhe dokumente ligjore, por sapo kanë mbërritur në Spanjë janë gjendur pa leje pune dhe pa garanci. Shumë prej tyre iu drejtuan sindikatës për ndihmë, dhe pak pas kësaj u pushuan nga puna.
Ndërkohë, Barcelona ka luajtur tashmë ndeshjen e parë në “Camp Nou” pas rikonstruksionit, duke fituar 4–0 ndaj Athletic Bilbao-s. Ndeshja e radhës në këtë stadium është planifikuar për 29 nëntor kundër Alavés, me fillim nga ora 16:15 sipas orës së Evropës Qendrore.
