Në një pasdite Pashke me shumë emocione në “Renato Dall’Ara”, Bologna arriti një tjetër goditje të madhe, duke mposhtur Interin me një gol spektakolar me roveshatë nga Riccardo Orsolini në minutën e 94-t. Ky rezultat i ndërlikon ndjeshëm rrugëtimin e zikaltërve drejt titullit dhe i afron napolitanët me kreun e renditjes.
Interi e nisi ndeshjen me ambicie dhe pas vetëm tre minutash rrezikoi me një goditje me kokë pas një goditje këndi. Por Bologna nuk u tremb, dhe në minutën e 11-të Ndoye goditi pranë shtyllës së djathtë të portierit Sommer.
Skuadra e drejtuar nga Italiano kishte rastin më të mirë të pjesës së parë kur Ndoye kaloi Acerbin dhe shërbeu për Dallingën në zonë, por tentativa e sulmuesit u devijua në mënyrë vendimtare nga Pavard.
Pjesa e parë u mbyll pa gola, ndërsa edhe në pjesën e dytë ritmi nuk ndryshoi shumë, me pak raste të rrezikshme për të dyja skuadrat. Rasti më i bujshëm ishte ai i Taremit, i cili pas një rivënie anësore nga Carlos Augusto, goditi shtyllën dhe më pas topi u ndal në vijën e portës nga Miranda – megjithatë loja ishte ndalur për një faull të Lautaros ndaj Ravaglia.
Kur dukej se ndeshja do të mbyllej pa gola, në sekondat e fundit të kohës shtesë ndodhi mrekullia për vendasit: një top i rikthyer në zonë u kontrollua nga Orsolini, i cili me një roveshatë të pabesueshme shënoi golin e fitores dhe hodhi në ekstazë tifozët në stadium.
Ky gol jo vetëm që i jep Bolognas tre pikë të arta në garën për Europë, por edhe i hap rrugën Napolit për të kapur kreun, ndërsa për Interin është një tjetër sinjal se garën për Scudetton nuk do ta kenë aspak të lehtë.
