Procesi gjyqësor ndaj Berishës dhe të bashkëpandehurve të tjerë të dosjes “Partizani” është shtyrë për në datën 15 shtator, mëson gazetarja e Vizion Plus, Blerina Cene.
Të pandehur lidhur me këtë dosje janë marrë ish-kryeministri i vendit, Sali Berisha së bashku me dhëndrin e tij, Jamarbër Malltezi.
Shkak për shtyrjen e seancës u bë kërkesa e avokatit të Berishës dhe Malltezit i cili kërkoi një trupë tjetër gjykuese.
“Gjyqtarët nuk ofrojnë gjykim të paanshëm pasi janë nën vëzhgim nga SPAK. Kemi një kërkesë për të përjashtuar treshen gjykuese nga procesi”, deklaroi avokati Genc Gjokutaj në seancë.
Të njëjtën kërkesë e ka përsëritur edhe vetë Malltezi. Në një deklaratë për mediat pas vendimit për të shtyre seancën, dhëndri i ish-kryeministrit Berisha u shpreh se si ai po ashtu dhe kryedemokrati kërkojnë që të gjykohen nga gjyqtarë të cilët ushtrojnë aktivitetin e tyre jashtë GJKKO-së.
“Janë të kërcënueshëm janë të cënueshëm janë pjesë që i nënshtrohen survejimit, kontrollit, monitorimit nga SPAK. Për këtë arsye nuk ajnë të pavarur, është detyra e shtetit të caktojë gjykatë të pavarur. Të gjithë gjyqtarët të cilët sipas ligjit nuk janë të shantazhueshëm, Kjo gjykatë këtu sipas ligjit është e shantazhueshme. I kemi informacionet që këtyre gjyqtareve këtu i sekuestrohet telefoni. Ne jemi në një çështje absurde që është nisur për të sulmuar Sali Berishën. Kanë nisur çështje për objekt të cilin nuk e kishin fare temë”, tha Malltezi.
