Në orën 19:00 të kësaj të diele ka përfunduar zyrtarisht procesi i votimit për zgjedhjet parlamentare në Shqipëri. Votimi ka nisur që në orët e para të mëngjesit, në orën 07:00, dhe është zhvilluar në të gjitha qendrat e votimit në vend.
Sipas rregullave zgjedhore, pas këtij orari të mbylljes, vetëm qytetarët që ndodhen ende në ambientet përreth qendrave të votimit kanë ende të drejtën për të hedhur votën e tyre.
Pas përfundimit të plotë të procesit, do të vijojë faza e mbylljes së dokumentacionit dhe më pas transportimi i kutive të votimit drejt qendrave të numërimit, ku do të nisë menjëherë procesi i numërimit të votave.
Vlen të theksohet se nga statistikat e publikuara nga Komisioni Qendror i Zgjedhjeve pjesëmarrja në këto zgjedhje ka qenë me pakët se në zgjedhjet e 2021. Deri në orën 18:00 kutive të votimit i janë drejtuar rreth 41.04% të votuesve.
Krahasuar me vitin 2021 kemi një pjesëmarrje gati 4.44% më të ulët, ku 4 vite më parë deri në orën 18:00 ka qenë afro 45.48%.
Sakaq kujtojmë se ky proces zgjedhor pati dhe tensione. Të shumta kanë qenë rastet e fotografimit të votës nga qytetarët, por nuk munguan as rastet e dhunës mes komisionerëve të forcave politike, por as mes qytetarëve.
Kujtojmë se në këto zgjedhje u regjistruan 8 forca politike dhe tre koalicione, ku në total janë në garë 2.046 kandidatë të cilët garojnë për 140 vendet e Kuvendit të Shqipërisë.
Në të gjithë vendin u ngritën 5.225 qendra votimi dhe 93 qendra numërimi, ndërkohë që në njësinë nr. 10 në Tiranë dhe në Vorë aplikohet si projekt pilot votimi dhe numërimi elektronik.
Në listën e zgjedhësve 114.642 ishin votues për herë të parë. Ndërsa. që për shkak të ligjit të dekriminalizimit 1.081 shqiptarë që janë dënuar për krime të rënda nuk kanë të drejtë të votojnë.
Risi në këto zgjedhje ka qenë vota e emigrantëve ku 246 mijë qytetarë që jetojnë jashtë vendit u regjistruan për të marrë pjesë dhe për të hedhur votën e tyre për politikanët dhe qeverinë të cilët dëshirojnë që të qeverisë në 4-vjeçarin e ardhshëm.
