Çmimet e naftës ranë në nivelin më të ulët të tri javëve këtë të martë, pasi zyrtarë të lartë amerikanë rritën shpresat për një marrëveshje me Iranin që do të mundësonte rihapjen e Ngushticës strategjike të Hormuzit.
Sekretari amerikan i Shtetit, Marco Rubio, dhe Sekretari i Thesarit, Scott Bessent, njoftuan se bisedimet kanë shënuar përparim, duke hapur mundësinë që transporti detar të rifillojë që këtë javë.
Çmimi i një fuçie nafte Brent, standardi global i çmimeve të naftës, ra me gati 5%, duke zbritur nën 80 dollarë, pas lajmeve se ndërprerjet e furnizimit mund të zbuten.
Megjithatë, dështimi i negociatave të mëparshme gjatë muajve të fundit për të ulur tensionet mes Shteteve të Bashkuara dhe Iranit e ka bërë tregun e naftës shumë të paqëndrueshëm, ndërsa konsumatorët përballen me çmime më të larta të karburanteve.
Të martën, krahas rënies së çmimit të naftës Brent, edhe nafta amerikane West Texas Intermediate (WTI) u ul me më shumë se 5%, në 76 dollarë për fuçi. Të dy kontratat arritën nivelin më të ulët që nga 13 korriku.
Sekretari amerikan i Shtetit, Marco Rubio, tha se është arritur përparim në bisedimet me Iranin dhe Omanin për të lejuar kalimin e më shumë anijeve përmes Ngushticës së Hormuzit.
“Është bërë përparim në këto bisedime, por ende nuk është arritur një marrëveshje përfundimtare. Shpresojmë që kjo të ndodhë shumë shpejt”, u tha Rubio gazetarëve në Departamentin e Shtetit.
Nga ana e tij, Sekretari i Thesarit, Scott Bessent, deklaroi se një marrëveshje për rihapjen e Ngushticës së Hormuzit mund të arrihet që të martën ose të mërkurën.
